როგორ შევინარჩუნოთ გამოცდილი თანამშრომლები?

თანამშრომელთა შენარჩუნება ყველა წარმატებული კომპანიის პრიორიტეტია. მიზეზები მრავალფეროვანია: მაღალკვალიფიციური პროფესიონალების დეფიციტი, მზარდი კონკურენცია ტალანტებისათვის და თანამშრომელთა ცვალებადი მოლოდინები, რაც კომპანიებს უბიძგებს, იზრუნონ გუნდის კვალიფიციური წევრების შენარჩუნებაზე.

კვლევები ადასტურებს, რომ ერთი თანამშრომლის ჩანაცვლება კომპანიას მისი წლიური ხელფასის ნახევრიდან ოთხმაგ ოდენობამდე უჯდება. თუმცა, ფინანსური დანახარჯი მხოლოდ ერთი ასპექტია. რეალურად კომპანია ამაზე მეტს კარგავს, რადგან გამოცდილი თანამშრომლები ფლობენ იმ უნიკალურ ცოდნას, რომელიც ორგანიზაციას კონკურენტულ უპირატესობას ანიჭებს.

ამიტომ კომპანიისთვის მნიშვნელოვანია ისეთი სამუშაო გარემოს შექმნა, სადაც ადამიანები ხანგრძლივად ისურვებენ დარჩენას. პოზიტიური ორგანიზაციული კულტურა თანამშრომელთა ერთგულებას თითქმის ოთხჯერ ზრდის.

თქვენი ბიზნესის წარმატება დიდწილად დამოკიდებულია იმაზე, თუ  როგორ ზრუნავთ თქვენს გუნდზე. ამ სტატიაში გაგიზიარებთ სტრატეგიებს, რომლებიც კვალიფიცირებული თანამშრომლების შენარჩუნებაში დაგეხმარებათ.

ეს სტრატეგიები გამოსადეგია ნებისმიერი მასშტაბის ბიზნესისთვის და მათი დანერგვა არ მოითხოვს აუცილებლად დიდ ბიუჯეტს, არამედ საჭიროებს მხოლოდ თქვენს ყურადღებასა და მზაობას პრიორიტეტად აქციოთ თანამშრომელთა კმაყოფილება.

რატომ ტოვებენ გამოცდილი თანამშრომლები სამსახურს?

სანამ პრობლემის გადაჭრაზე ვისაუბრებთ, მნიშვნელოვანია გავიგოთ, რა იწვევს გამოცდილი თანამშრომლების წასვლას. ამას რამდენიმე მიზეზი აქვს, რომელთაც ქვემოთ განვიხილავთ.

არასაკმარისი ანაზღაურება და ბენეფიტები

ანაზღაურება კვლავ რჩება თანამშრომელთა მოტივაციის ერთ-ერთ მთავარ ფაქტორად. გამოცდილი პროფესიონალები აფასებენ საკუთარ შესაძლებლობებს შრომის ბაზარზე და მოელიან შესაბამის კომპენსაციას.

HR ანალიტიკა საშუალებას გაძლევთ შეაფასოთ, რამდენად კონკურენტულია ანაზღაურება. თანამედროვე ტექნოლოგიებით შესაძლებელია ბაზარზე არსებული ანაზღაურების მონაცემების ანალიზი და შესაბამისი გადაწყვეტილებების მიღება.

არაეფექტური მენეჯმენტი

მენეჯერები უშუალო გავლენას ახდენენ თანამშრომელთა ყოველდღიურ გამოცდილებაზე. კვლევები აჩვენებს, რომ მენეჯერებთან ურთიერთობა გავლენას ახდენს გადაწყვეტილებაზე— ხანგძლივად დარჩება თუ არა თანამშრომელი კომპანიაში .

არაეფექტური კომუნიკაცია, გუნდის წევრების არასათანადო მხარდაჭერა, მიკრომენეჯმენტი ან უსამართლო მოპყრობა ამცირებს თანამშრომელთა მოტივაციას. ამიტომ, HR მართვის თანამედროვე მიდგომებში განსაკუთრებული ყურადღება ექცევა მენეჯერული უნარების განვითარებას.

კარიერული ზრდის ნაკლებობა

გამოცდილი პროფესიონალები მუდმივად ეძებენ განვითარების ახალ გზებს. როცა კომპანიაში არ არის წინსვლის პერსპექტივა ან არ არსებობს ახალი უნარების შეძენის შესაძლებლობა, ისინი იწყებენ ალტერნატივების ძიებას.

გადაწვა და ცუდი სამუშაო-ცხოვრების ბალანსი

თანამედროვე სამუშაო გარემოში გადაწვა (Burnout) სერიოზულ პრობლემად იქცა. კვლევების თანახმად, დასაქმებულთა თითქმის ნახევარი განიხილავს სამსახურის დატოვებას, თუ ის მათ პირად ცხოვრებაზე უარყოფით გავლენას ახდენს.

მუდმივი სტრესი, ზეგანაკვეთური სამუშაო და პირადი ცხოვრებისთვის დროის ნაკლებობა იწვევს ფიზიკურ და ემოციურ გამოფიტვას. თიმბილდინგი და სხვა აქტივობები დადებითად მოქმედებს გუნდის წევრების მდგომარეობაზე.

არასაკმარისი დაფასება და აღიარება

არავის მოსწონს, როცა მის შრომას არ აფასებენ. კვლევების მიხედვით, დაუფასებლობის განცდა თანამშრომლებში სამსახურის დატოვების ალბათობას ორჯერ ზრდის.

დაფასების ნაკლებობა განსაკუთრებით მტკივნეულია გამოცდილი თანამშრომლებისთვის, რომლებმაც წლების განმავლობაში დაამტკიცეს თავიანთი ღირებულება და დიდი წვლილი შეიტანეს კომპანიის განვითარებაში.

ნეგატიური ორგანიზაციული კულტურა

ტოქსიკური სამუშაო გარემო, რომელშიც პატივისცემა და სამართლიანობა არ არის დამკვიდრებული, ზრდის თანამშრომლების წასვლის ალბათობას. ორგანიზაციული კულტურა, რომელიც არ შეესაბამება თანამშრომლის პირად ღირებულებებს, ასევე უბიძგებს მათ ახალი შესაძლებლობების ძიებისკენ.

მნიშვნელოვანია გავაცნობიეროთ, რომ ხშირად ეს მიზეზები დაკავშირებულია და ერთმანეთს აძლიერებს. მაგალითად, ცუდი მენეჯმენტი ხშირად იწვევს გადაწვას, ხოლო არასაკმარისი ანაზღაურება უფრო მძაფრად აღიქმება, როცა თანამშრომელი არ გრძნობს თავს დაფასებულად და არ არსებობს კარიერული ზრდის პერსპექტივა.

გამოცდილი თანამშრომლების შენარჩუნება მოითხოვს ამ ფაქტორების გააზრებას და სისტემურ მიდგომას მათ მოსაგვარებლად. მნიშვნლოვანია ონბორდინგის პროცესისას და შემდგომ ეტაპებზეც თანამშრომლებზე ზრუნვა.

სტრატეგიები გამოცდილი თანამშრომლების შესანარჩუნებლად

გამოცდილი თანამშრომლების შენარჩუნება კომპლექსური ამოცანაა, რომელიც მოითხოვს მრავალმხრივ მიდგომას. გთავაზობთ პრაქტიკულ სტრატეგიებს, რომელთა დანერგვაც შესაძლებელია ნებისმიერი ზომის ორგანიზაციაში.

ანაზღაურების სამართლიანი სისტემის შემუშავება

მიუხედავად იმისა, რომ ანაზღაურება არ არის ერთადერთი მოტივატორი, ის კვლავ დიდ გავლენას ახდენს თანამშრომლის გადაწყვეტილებებზე. რეგულარული ბაზრის კვლევა საშუალებას მოგცემთ თქვენი ანაზღაურება შეესაბამებოდეს ან აღემატებოდეს საბაზრო განაკვეთებს. ანაზღაურების გამჭვირვალე სისტემა კი დაეხმარება თანამშრომლებს გაიგონ როგორ განისაზღვრება მათი ანაზღაურება და რა ნაბიჯებია საჭირო მის გასაზრდელად.

თუ შეზღუდული ბიუჯეტი გაქვთ, გამოიყენეთ არაფულადი ბენეფიტები, მაგალითად, მოქნილი სამუშაო გრაფიკი, დამატებითი შვებულება, პროფესიული განვითარების შესაძლებლობები ან ჯანმრთელობის დაზღვევა. ზოგიერთი კომპანია იყენებს HR აუთსორსინგს კონკურენტუნარიანი კომპენსაციის სისტემის შესაქმნელად, რაც მათ საშუალებას აძლევს გამოიყენონ ექსპერტული ცოდნა და საბაზრო ინფორმაცია.

ლიდერული უნარების გაძლიერება მენეჯერებში

მენეჯერები უდიდეს გავლენას ახდენენ თანამშრომელთა ყოველდღიურ გამოცდილებასა და ჩართულობაზე. ინვესტირება მათ განვითარებაში დადებითად აისახება თანამშრომლების შენარჩუნებაზე.

რეგულარული ტრენინგები ეფექტური კომუნიკაციის, უკუკავშირის მიწოდების, კონფლიქტების მართვისა და ემპათიის უნარების განვითარებისთვის კრიტიკულად მნიშვნელოვანია. მენეჯერებს სჭირდებათ დრო თითოეულ თანამშრომელთან ინდივიდუალური საუბრისთვის მათი პროგრესის, გამოწვევებისა და კარიერული მისწრაფებების შესახებ.

განიხილეთ მენეჯერების შეფასების სისტემაში თანამშრომელთა შენარჩუნების მაჩვენებლების ჩართვა.

კარიერული განვითარების შესაძლებლობების შექმნა

გამოცდილ თანამშრომლებს სჭირდებათ განვითარებისა და წინსვლის შეგრძნება. მკაფიო კარიერული გზების შექმნა და კომუნიკაცია საშუალებას მისცემს მათ, დაინახონ თავიანთი მომავალი ორგანიზაციაში. ხშირად თანამშრომლები ტოვებენ კომპანიას ახალი გამოწვევების საძიებლად, შიდა მობილობის წახალისება და განსხვავებულ პროექტებში მონაწილეობის შესაძლებლობა შეიძლება ამ პრობლემის გადაჭრის გზა გახდეს .

მნიშვნელოვანია, თითოეულ გამოცდილ თანამშრომელთან პერსონალიზებული განვითარების გეგმის შექმნა. ეს გეგმა უნდა მოიცავდეს როგორც პროფესიული, ასევე პიროვნული განვითარების მიზნებს და კონკრეტულ ნაბიჯებს მათ მისაღწევად.

შეზღუდული ბიუჯეტის პირობებშიც კი, შესაძლებელია განვითარების შესაძლებლობების შეთავაზება შიდა ვორქშოპების, მენტორობის პროგრამების ან ონლაინ კურსების თანადაფინანსების მეშვეობით.

სამუშაო და პირადი ცხოვრების ბალანსი 

გადაწვა თანამედროვე სამუშაო გარემოს სერიოზული პრობლემაა, განსაკუთრებით გამოცდილი თანამშრომლებისთვის, რომლებსაც ხშირად მეტი პასუხისმგებლობა აკისრიათ.

მოქნილ სამუშაო პირობებში, როგორებიცაა, დისტანციური მუშაობა, მოქნილი საათები ან 4 დღიანი სამუშაო კვირა, თანამშრომლები უკეთ აბალანსებენ პროფესიულ და პირად ცხოვრებას. 

რეგულარულად შეაფასეთ, არის თუ არა თანამშრომლების დატვირთვა გონივრული. გადაჭარბებული მოლოდინები და არარეალისტური მოთხოვნები ხშირად ხდება გადაწვის მიზეზი.

აღიარების სისტემის დანერგვა 

აღიარება და დაფასება ადამიანური მოტივაციის ძირითადი კომპონენტებია. შექმენით რეგულარული და მრავალფეროვანი აღიარების სისტემა, რომელიც მოიცავს როგორც ფორმალურ (პრემიები, ჯილდოები), ისე არაფორმალურ (საჯარო მადლობა, გუნდური აღნიშვნა) ელემენტებს.

გაითვალისწინეთ, რომ სხვადასხვა ადამიანს აღიარების განსხვავებული პრეფერენციები აქვს,  ზოგს მოსწონს საჯარო აღიარება, ზოგს კი ინდივიდუალური. პერსონალიზებული მიდგომა დაგეხმარებათ  თითოეული თანამშრომელი მასზე მორგებული ფორმით დააფასოთ.

პოზიტიური ორგანიზაციული კულტურის ჩამოყალიბება

კომპანიის კულტურა განსაზღვრავს, როგორ გრძნობენ თავს ადამიანები სამუშაო ადგილზე. მკაფიო ღირებულებების განსაზღვრა და დანერგვა ქმნის საერთო მიზანს და იდენტობას, რაც აძლიერებს თანამშრომლების მიკუთვნებულობის განცდას.

ნდობა და გამჭვირვალობა კულტურის მნიშვნელოვანი შემადგენელი ელემენტებია. როდესაც კომპანია ღიად უზიარებს თანამშრომლებს ინფორმაციას მისი მდგომარეობის, გამოწვევებისა და გეგმების შესახებ, ისინი თავს უფრო ჩართულად და დაფასებულად გრძნობენ.

ინკლუზიური გარემოს შექმნა, სადაც ყველა თანამშრომლის აზრი ფასეულია, ასევე ზრდის ლოიალობას. ჩაატარეთ ანონიმური გამოკითხვები და ინდივიდუალურად გაესაუბრეთ თანამშრომლებს, რათა რეგულარულად შეაფასოთ და გააუმჯობესოთ თქვენი ორგანიზაციული კულტურა.

მიმზიდველი სამუშაო გარემოს შექმნა იწყება კომპანიის შიგნიდან, რაც დამსაქმებლის ბრენდინგის საფუძველია. ჯანსაღი ორგანიზაციული კულტურა იზიდავს ახალ პროფესიონალებს და ამავდროულად ხელს უწყობს არსებული თანამშრომლების შენარჩუნებას.

გამოცდილი თანამშრომლების შენარჩუნება არ არის ერთჯერადი ღონისძიება, ეს უწყვეტი პროცესია, რომელიც მოითხოვს სტრატეგიულ მიდგომას და ყველა დონეზე ჩართულობას. 

ეფექტური HR ადმინისტრირების წყალობით, ეს სტრატეგიები მხოლოდ თეორიულ დონეზე არ დარჩება, არამედ ისინი ყოველდღიურ პრაქტიკაშიც აისახება. სწორი HR პროცესების დანერგვა, დაწყებული გამჭვირვალე შეფასების სისტემებით, დამთავრებული კარიერული განვითარების გეგმებით, აუცილებელი ინსტრუმენტია თანამშრომელთა შენარჩუნებისთვის.

ყურადღება მიაქციეთ, რომ თითოეული ორგანიზაცია უნიკალურია და შესაბამისად, შენარჩუნების სტრატეგიებიც უნდა იყოს მორგებული თქვენი კომპანიის სპეციფიკაზე, ზომაზე, ინდუსტრიასა და კულტურაზე. 

თავდაპირველად, მოუსმინეთ თქვენს თანამშრომლებს. ხშირად მათთან საუბარი უტყუარი ინფორმაციის წყაროა იმის შესახებ, თუ რა მუშაობს ორგანიზაციაში და რა — არა.

 

თანამშრომელთა შენარჩუნება არის არა მხოლოდ HR დეპარტამენტის, არამედ მთელი ორგანიზაციის პასუხისმგებლობა.  შეაფასეთ არსებული HR პრაქტიკა, გამოავლინეთ ხარვეზები და შეიმუშავეთ კონკრეტული გეგმა მათ გამოსასწორებლად. გახსოვდეთ, რომ ერთად შეგიძლიათ შექმნათ გარემო, სადაც გამოცდილ თანამშრომლებს ენდომებათ დარჩენა და განვითარება.